19. og 20. juni 2010

Transporten skjer med 4-5 raske passasjerbåtar som går frå Fugleskjærskaia (hovudkaia i Florø). Desse har ikkje faste rutetider, men går med ein gong dei er oppfylte. På kaia fins ein stor parkeringsplass som også bussar kan nytte. Båtturen tek kring 25 minutt. På Kinn er det ein kilometers gange på flat veg. Dei første framsyningane kvar dag har samla mest folk tidlegare år. Difor er det kortare ventetid på kaiene og betre plass på Kinn ved dei siste framsyningane.

NB! På Kinn er det bilskyss for rørslehemma.

Kinnaspelet er tilrettelagt for synshemma, etter eit vellykka prøveprosjekt i 2005. Tilrettelegginga er av forskjellig art. Ein tilbyr mellom anna gratis ledsagar på kaia i Florø og på Kinn, reserverte plassar og synstolk under spelet. Det er også mogeleg å bli frakta i bil frå kaia på Kinn til kyrkja (ca 1 km). Det er utarbeidd brosjyre i storskrift. Kontakt oss dersom du har behov for synstolk eller ledsagar til Kinnaspelet.

Hugs at du er langt til havs, særleg nordavinden kan vere kald her ute. Varme kle og godt skotøy er difor viktig dersom vêret ikkje er det aller beste. Kinnaspelet har vore velsigna med mykje godt vêr, men det har også vore gjennomført framifrå framsyningar i regnvêr. Om det skulle komme regn i 2006, vil Kinnaspelet likevel bli framført. Det blir berre ei litt annleis oppleving.

Fjord1 Fylkesbaatane arrangerer turar (med eller utan overnatting i Florø) frå Bergen i samband med Kinnaspelet. Også frå andre stader vert det arrangert fellesreiser, og overnattingsstadene i Florø har tilbod i alle prisklassar. Sjå lokalavisene, spør på reisebyrå eller hjå Fjord1 Fylkesbaatane.

For rutetider gå til www.ruteinfo.net

Velkomen til Kinnaspelet 19. og 20. juni 2010